ابن مصر الحرَّه

يللي روحك حتّه منِّي

يللي ضحيت قبل منِّي

يللي أعطيت مصر عمرك

ف. الدفاع عنها وعنِِِّي

يللي بصمودك حاميتني

يللي بجراحك داوتني

يللي بدَّلت ظنوني

وافتدتني من جنوني

وابتديت اشوف بقلبك

كل نور غاب عن عيوني

لجل مصر ولولادي

لجل حرية بلادي

بك بقلبك يا فدائي

يا دَوَائِي .. يا شِفائي

دبِّت الروح جوه فاني

والتقيتني.. في صمودك

ابن مصر الحرّه تاني

الفساد ما عدش ينفع

والبلاد لازم هترجع

للي عايز يبني مصر

يا ابن مصر مش هاهوِّل

الفساد لمَّا يطُّول

يبقى لازم م. الحذر

ياما عشت سنين همومك

واتسرق صحوك ونومك

جه ف. يوم تفخر بنصر

الجذور ف. الأرض باقيه

والفروع وقعت ف. ساقيه

بس لسَّه في خطر

للفساد أعوان كتيره

والحياه دامت مريره

أوعى تستسلم لظالم

ازرع الأرض ويَلَّه

وارض دا المقسوم علله

وارْضِ ربك تحيا سالم

يا ابن مصر اعمل لبكره

ميِّة النيل طهره حرَّه

واعفُ.. ربّك خير حاكم

يَلَّه بينا م. السَّعادي

ندعِ رَبِّ الكون.. بلادي

إنت بس بحالها عالم

اهدِ يا ربِّ شبابنا

خَلِّ ركب الخير ببابنا

نهر جاري ف. كل عصر

ربِّ يا ناصر ولادي

ارْوِهم من نيل بلادي

واحفظ الله..

احفظ اللهم مصر